Fjölbreytilegir kyrrðardagar í vetur

29736354Nú í vetur  býður Skálholtsskóli upp á fjölbreytilegar kyrrðardaga sem hafa það að markmiði að rækta mennskuna og næra andlegt líf og trú. Kyrrðardagar hafa áunnið sér sterka hefð hér í Skálholti en þeir hafa verið haldnir allt frá árinu 1989. Til að byrja með voru þeir í umsjón Sigurbjörns Einarssonar biskups.

Kyrrðardagar vetrarins eru sem hér segir:

“Að ganga með sjálfum sér”. Pílagrímadagar í Skálholti 27. -30. október.
Stef pílagrímsins verða í brennidepli á Pílagrímadögum í Skálholti 13. – 15. nóvember n.k. Lögð er áhersla á útivist og göngur út frá staðnum, hollustu í mataræði, jóga, slökun og kyrrðarstundir – að ganga með sjálfum sér og að ganga með öðrum.
Þau sem leiða Pílagrímadagana eru Auður Bjarnadóttir jógakennari hjá Jógasetrinu, Axel Árnason héraðsprestur, Elínborg Sturludóttir sóknarprestur, Halldór Reynisson starfandi rektor í Skálholti og Margrét Jónsdóttir Njarðvík spænskufræðingur en hún hefur leitt pílagrímagöngur til Santiago de Compostela undanfarin ár.

Kyrrðardagar á aðventu    9. – 11. desember
Slökun, íhugun og kyrrð til undirbúnings jólanna. Kyrrðardagar á aðventu hefjast föstudaginn 9. desember kl. 18 og þeim lýkur sunnudaginn 11. desember um kl. 13.
Umsjón sr. Jóhanna Magnúsdóttir starfandi sóknarprestur í Skálholti. Upplýsingar: Halldór Reynisson.

Kyrrðardagar f. guðfræði- og djáknanema    27-29 janúar 2017
Umsjón:  Sr. Halldór Reynisson, Ragnheiður Sverrisdóttir, djákni og sr. Þorvaldur Víðisson
Kyrrðardagar fyrir konur í Skálholti 9.-12. mars 2017
Umsjón: Anna Stefánsdóttir, Kristín Sverrisdóttir og Þórdís Klara Ágústsdóttir.

Kyrrðardagar fyrir konur 9. – 12. mars

Kyrrðardagar kvenna eru samvera fyrir konur, sem vilja njóta nærveru Guðs í einingu og friði. Umhverfi Skálholts býður upp á hvíld, kyrrða, næði og næringu fyrir líkama sál og anda. Kyrrðardagar kvenna hefjast á fimmtudeginum 9. mars kl.18:00 og þeim lýkur með þáttöku í messu  sunnudag 12. mars kl. 11.
Umsjón: Anna Stefánsdóttir, Kristín Sverrisdóttir og Þórdís Klara Ágústsdóttir.

Kyrrðardagar í dymbilviku   12.-15. apríl
Kyrrðardagar í dymbilviku í Skálholti eru elstir meðal kyrrðardaganna. Þeir hafa verið haldnir í rúman aldarfjórðung. Óhætt er að segja að enginn hafi sett svip sinn á þá og á mótun þeirra meir en Sigurbjörn Einarsson biskup sem leiddi þá um margra ára skeið.Kyrrðardagarnir hefjast miðvikudaginn í dymbilviku með kvöldbænum kl. 18 og þeim lýkur laugardaginn fyrir páska um hádegi.

Pílagrímakyrrð 20. -23. apríl
Þessir kyrrðardagar leggja áherslu á útivist og göngur og pílagrímahefðina. Þeir falla að málþingi sem Skálholtsfélagið heldur um pílagrímastefið laugardaginn 22. apríl. Umsjón sr Axel Njarðvík héraðsprestur.

Kyrrðarbæn og íhugun 4.- 7. maí
„Kyrrðarbænasamtökin“ standa fyrir kyrrðardögum í Skálholti 4.-7. maí (hægt verður að framlengja dvölina til 11. maí) þar sem áhersla verður lögð á iðkun Kyrrðarbænarinnar (kristilegrar íhugunar). Það þekkja allir sem reynt hafa að kyrrðin í Skálholti styður einstaklega vel við íhugunariðkunina. Þeim sem sækja kyrrðardagana býðst þar að auki frábært tækifæri til að fá leiðsögn í jóga og djúpslökun sem auka liðleika og veita góðan stuðning við íhugunina. Áhrifin af Kyrrðarbæninni, jógaæfingum, útiveru og hvíld í Skálholti leggjast á eitt að skapa einstaka dvöl.
Leiðbeinendur eru: Sr. Bára Friðriksdóttir, Sigurbjörg Þorgrímsdóttir, djáknakandídat og Auður Bjarnadóttir, jógakennari.

Þess má geta að kyrrðardagar kvenna voru haldnir í september  s.l. og voru þeir mjög vel sóttir.