Sunnudaginn 22. september setti sr. Halldóra J. Þorvarðardóttir prófastur Suðurprófastsdæmis Bergþóru Ragnarsdóttur í embætti djákna og sr. Kristínu Þórunni Tómasdóttur í embætti sóknarprests í Skálholtsprestakalli.
Við fjölsótta guðsþjónustu þjónuðu líka Herdís Friðriksdóttir framkvæmdastjóri Skálholts og Vigdís Fjóla Þórarinsdóttir fermingarbarn, auk sr. Óskars Hafsteins Óskarssonar og Kristjáns Björnssonar vígslubiskups. Jón Bjarnason lék á orgel og leiddi Skálholtskórinn í sálmasöng. Messukaffi var í Skálholtsskóla þar sem vígslubiskup ávarpaði samkomuna.
Á þessum gleðidegi var sérstaklega ánægjulegt að sjá aftur djákna í þjónustu við Skálholtsstað en djákni hefur ekki verið á staðnum síðan fyrir siðbót. Í prédikun sinni minnti sr. Kristín Þórunn á þetta og sagði að nú yrði ekki leiðinlegt fyrir neinn að vera í Skálholti, eins og sagt var um þá daga þegar Þorlákur helgi sat staðinn.
Comentarios