Hin árlega pílagrímaganga verður gengin frá Reynivallakirkju í Kjós að Þingvallakirkju til Skálholtsdómkirkju á Skálholtshátíð. Leiðinni er skipt upp á fjóra göngudaga frá fimmtudeginum 20. júlí til sunnudagsins 23.júlí og hefjast göngurnar kl. 9 alla daganna. Göngudagarnir eru mislangir en hverjum er frjálst að skrá sig og ganga eina dagleið eða part úr dagleið
Dagur 1. Reynivallakirkja kl. 9 að Stíflisdal (við brúna) Dagur 2. Stíflisdalur að Þingvallakirkju. Dagur 3. Þingvallakirkja að Neðra Apavatni. Dagur 4. Neðra Apavatn inn í Skálholtsdómkirkju.
Gangan er fólki að kostnaðarlausu en gert er ráð fyrir að fólk finni sér gistingu sjálft. Útbúnaður og nesti er á ábyrgð hvers og eins.
Hluti göngunnar er gegnin í kyrrð og við hverja áningu er stutt íhugun, bæn eða ritningarlestur. Hver gengur á sínum hraða í þögn eða spjalli, allt eftir vilja hvers og eins.
Löng hefð er fyrir pílagrímagöngu frá Þingvöllum til Skálholts á Skálholtshátíð sem haldin er árlega í kring um Þorláksmessu að sumri 20. júlí. Einnig hefur verið gengið frá öðrum stöðum að Skálholtsdómkirkju í gegnum tíðina. Fyrir nokkrum árum var byrjað að ganga frá Reynivallakirkju í Kjós að Þingvallakirkju.
Göngustjórar pílagrímagöngunnar eru hjónin sr. Arna Grétarsdóttir sóknarprestur á Reynivöllum í Kjós (gsm. 865 2105) og Rúnar Vilhjálmsson.
Í ár er vegleg hátíðardagskrá í Skálholti í tilefni af 60 ára afmæli Skálholtsdómskirkju. Nánar um dagskrá Skálholtshátíðar má sjá á www.skalholt.is
Nánar um Pílagrímagöngur. Pílagrímagöngur eru hluti af hinum kristna menningararfi. Þau sem ferðast til heilagra staða eru kallaðir pílagrímar. Þetta orð er komið úr miðaldalatínu (pelegrinus) en á rætur í klassískri latínu (peregrinus, útlendingur). Slíkar göngur eru farnar af misjöfnum ástæðum; í þakkargjörð, í yfirbótarskyni eða af trúarlegum og/eða menningarlegum áhuga. Gengið er í áföngum en hlé eru notuð til bænahalds, ritningarlesturs eða til íhugunar og kyrrðar. Sjö lyklar pílagrímsins eru: Frelsi, Einfaldleiki, Rósemi, Kyrrð (Þögn), Æðruleysi, Samkennd og Andlegur vöxtur. Þessir lyklar verða sérstaklega íhugaðir með þeim hætti sem hver og einn kýs.
Comments